დაიბადა 1958 წლის 18 მარტს თბილისში. 1975–1980 წლებში სწავლობდა თბილისის ივანე ჯავახიშვილის სახელობის სახელმწიფო უნივერსიტეტის გეოგრაფიის ფაკულტეტზე, საზღვარგარეთის ქვეყნების ეკონომიური და სოციალური გეოგრაფიის სპეციალობაზე, 1977–1980 წლებში – იქვე საერთაშორისო გამოკვლევებისა და სწავლების განყოფილებაზე, 1980–1983 წლებში – საქართველოს მეცნიერებათა აკადემიის გეოგრაფიის ინსტიტუტის ასპირანტურაზე, 1983–1987 წლებში – შოთა რუსთაველის სახელობის თეატრისა და კინოს ინსტიტუტის კინოსარეჟისორო ფაკულტეტზე (ლანა ღოღობერიძისა და ომარ გვასალიას სახელოსნო). 1983 წლიდან მოღვაწეობს პროდიუსერად და რეჟისორად კინოსა და ტელევიზიაში, 1988 წლიდან ეწევა აქტიურ პედაგოგიურ მოღვაწეობას თბილისის სახელმწიფო უნივერსიტეტსა და თეატრისა და კინოს ინსტიტუტში.